في أغلب الأحيان وانت في السنة الأخيرة من التعليم الجامعي بتكون محتار، تدور على شغل بمؤهلك ولا تدور على حاجة في مجال مختلف؟ لو أنت في كلية أدبية مثلاً ومعظم اللى بيتخرجوا منها بيشتغلوا حاجات ملهاش أي علاقة بمجالهم أو لو حتى في كلية علمية دخلتها برغبتك وأكتشفت على الرغم من حبك للمواد اللى بتدرسها إلا أنك مش شايف نفسك بتشتغل مهندس أو دكتور مثلاً!!
المرحلة دى بتكون محيرة جداً خصوصاً إننا بنكون شايفين إن معظم المجالات بتكون محتاجة تأهيل خاص بيها ودة إستثمار بيكون غالى في الوقت دة, وإزاى تحدد أصلا وانت مجربتش بنفسك المجالات دى ومش عارف حتكون مستريح فيها ولا لأ؟ الإختيارات كتير والوقت محدود.
هنا بييجى دور التنمية المهنية. التنمية المهنية بتساعدك على أنك تلاقى إجابة السؤال المشهور، اية الحاجة اللى اشتغلها وأكون ممتميز فعلا فيها وسعيد. بلاش سعيد دلوقتى علشان دة موضوع لوحدة.
مبدأيا محتاجين نعرف الفرق بين المسار المهنى Career والوظيفةJob . الوظيفة دى هي الحاجة اللى انت بتعملها حالياً، بتتحدد في كتير من الأحيان على أساس المتاح في السوق أو إحتياجاتك الحالية والشكل الأمثل للوظيفة أنها تكو جزء من المسار المهنى ليك. أما المسار المهنى هي رحلتك العملية من أول ما بتدخل الدراسة لحد التقاعد. دة بيتضمن التعليم والوظيفة وعلاقاتك مع الناس. اللى بيحصلنا في الواقع أننا في الأغلب بتنقل من وظيفة للتانية من غير ترتيب معين أو حتى علاقة بين الوطائف وبعض. وبتلاقى نفسك في الآخر في مسار وظيفى بتقضى فية أكثر من تلت عمرك من غير ما يحقق كل إمكانياتك وطموحك ويستغل كل قدراتك.
دور التنمية المهنية أنة يعرفك على شخصيتك كويس ويخلي عندك وعى ذاتى تقدر على أساسة تعمل إختيارات مبنية على أساس صح. في التنمية المهنية بنستخدم مجموعة من الإختبارات المهنية اللى بتعرفك على جوانب مختلفة من شخصيتك، زى الإهتمامات والقيم والمهارات وسمات الشخصية والذكاء العاطفى، وحاجات تانية كتير بتكون شكل حياتك وطريقة تصرفاتك مع نفسك ومع اللى حواليك. مرحلة الوعي الذاتي هي من أهم المراحل في حياة التنمية المهنية لأنها كمان بتنعكس بشكل كبير على جميع جوانب الحياة بالإضافة للجانب العملى. ومش شرط بس أننا نعرف معلومات عن نفسنا الفكرة الأساسية إزاى نستخدم المعلومات دى وكمان نتقبل نفسنا. كارل روجر العالم النفسى الكبير بيقول إن الخطوة الحقيقية في التغيير هو إننا نقبل نفسنا.
المرحلة التانية في التنمية المهنية إننا نبدأ نكتشف الإختيارات الموجودة حوالينا. وعلى عكس ما إتعودنا إن الإختيارات محدودة فعلى العكس في الوقت اللى إحنا عايشيين فية. اى حد فينا عايز يعمل حاجة ممكن يعملها لأن الحواجز اللى كانت موجودة أختفت مع التطور الكبير اللى حاصل الأيام دى. الإختيارات كتير وممكن علشان قدر نتعرف على أكترها نستخدم قواعد البحث عن الوظائف أو أننا نسأل متخصصين في المجال.
بعد تعرضنا لآلاف الإختيارات جة وقت التركيز. وإحنا هنا بنختار أكتر مسارات وظيفية مناسبة لإهتماماتنا وقيمنا ومهاراتنا وكل اللى اتعرفنا علية كويس جداً في المرحلة الأولى. في المرحلة دى بنقدر نحدد الأهداف المرحلية والكلية لحياتنا المهنية وبنحطها في شكل خطة نبدأ في تنفيذها. ومع الخطة المهنية بتكون خطة تطوير الذات اللى حتمكنا من الوصول لهدفنا بسهولة.
المرحلة الأخيرة هو أنك تبدأ في تنفيذ الخطة بالفعل وتختار Mentor يتابعك في تنفيذها ويتأكد أنك ماشى عليها.
في النهاية التنمية المهنية هي عملية مستمرة، يعنى بتفضل طول عمرك تكتشف أكتر عن نفسك وأنك تحط أهداف جديدة وتحققها، الخطوة الأولى هي دايماً الأصعب فالأفضل أنك تعملها دلوقتى مش بعدين.
رنا رضا
ميسر تنمية مهنية
مؤسس ومدير لشركة Smart Careers
 |
| Career Development Process عملية التنمية المهنية |
No comments:
Post a Comment